Нохчийн Республикин Правительствон Председателан заместитела, республикин йуьртабахаман министра Мацуев Висхана дийцарехь, хӀокху шарахь аренашкахь дӀахьочу балхана йукъаозийна кхузаманан лехамашца йогӀуш йолу 621 комбайн а, йалта дӀасадахьаран 663 техника а йу. Цул сов йалта цӀандарна а, Ӏалашдарна а лерина йолу меттигаш а йу кечйина.
Кадыров Рамзана билгалдаьккхира, кхушарлера кӀа чӀогӀа аьхна а, дика а хилар, цунах дика дама даккхалург хилар. Мацуев Висхана дийцира берриге а белхаш хӀоттийначу планаца а догӀуш дӀахьош хиларх лаьцна. Техникица а, говзанчашца а цхьана а кепара кхачамбацарш дац.
Кадыров Рамзана ша а комбайн хьалха а хиъна болх бира йалта чудерзорехь. Цо билгалдаьккхира вайн техника тоьллачех хилар.
Нохчийчоьнан Мехк-Дас билгалдаьккхира Мацуев Висхана хьоьгуш долу къа а. Цо республикин аграрин сектор йоццачу хенахь керлачу тӀегӀанна тӀе йаьккхина. Цо жоьпалле шен болх бар бахьана долуш кхуьуш йу аграрин хьаьрма. Республикин Мехк-Дас баркалла элира цунна лакхарчу тӀегӀанехь шех тешийна болх дӀабахьарна.
